Bakı Apellyasiya Məhkəməsi
Azərbaycan xalqının ümummilli lideri Heydər Əliyevin rəhbərliyi və yaxından iştirakı ilə aparılmış məhkəmə hüquq islahatlarının ilkin nəticələrindən biri olaraq respublikamızda üçpilləli məhkəmə sistemi – birinci instansiya, apellyasiya instansiyası və kassasiya instansiyası məhkəmələri yaradılmış və bu sistem Azərbaycan Respublikasında məhkəmə sisteminin müasirləşdirilməsi və “Azərbaycan Respublikasının bəzi qanunvericilik aktlarına dəyişikliklər və əlavələr edilməsi haqqında” Azərbaycan Respublikası Qanununun tətbiq edilməsi barədə Azərbaycan Respublikası Prezidenti İlham Əliyevin imzaladığı 19 yanvar 2006-cı il tarixli Fərmanla yeni mərhələyə qədəm qoymuşdur.
16 iyul 2007-ci il tarixindən fəaliyyətə başlamış Bakı Apellyasiya Məhkəməsi mülki, inzibati və iqtisadi mubahisələrə dair, cinayət və inzibati xətalara dair işlər uzrə yuxarı instansiya məhkəməsidir.
Bakı Apellyasiya Məhkəməsi Rəyasət Heyətindən, mülki kollegiyadan, inzibati-iqtisadi kollegiyadan, cinayət kollegiyasından və hərbi kollegiyadan ibarətdir.
Bakı Apellyasiya Məhkəməsinin kollegiyaları apellyasiya instansiyası məhkəməsi kimi öz ərazi yurisdiksiyasına aid edilmiş birinci instansiya məhkəmələri tərəfindən baxılmış işlər üzrə qərarlardan verilmiş apellyasiya şikayətləri və apellyasiya protestləri üzrə işlərə baxır.
Bakı Apellyasiya Məhkəməsinin yurisdiksiyasına aid olan birinci instansiya məhkəmələri aşağıdakılardır:
- Binəqədi Rayon Məhkəməsi;
- Xəzər Rayon Məhkəməsi;
- Xətai Rayon Məhkəməsi;
- Qaradağ Rayon Məhkəməsi;
- Nərimanov Rayon Məhkəməsi;
- Nəsimi Rayon Məhkəməsi;
- Nizami Rayon Məhkəməsi;
- Sabunçu Rayon Məhkəməsi;
- Səbail Rayon Məhkəməsi;
- Suraxanı Rayon Məhkəməsi;
- Yasamal Rayon Məhkəməsi;
- Ağır Cinayətlərə Dair İşlər üzrə Azərbaycan Respublikasının Məhkəməsi (Bakı Apellyasiya Məhkəməsinin yurisdiksiyasına daxil olan ərazi vahidlərində baş vermiş cinayətlərlə bağlı işlər və digər materiallar üzrə);
- Ağır Cinayətlərə Dair İşlər üzrə Azərbaycan Respublikasının Hərbi Məhkəməsi (Bakı Apellyasiya Məhkəməsinin yurisdiksiyasına daxil olan ərazi vahidlərində baş vermiş cinayətlərlə bağlı işlər və digər materiallar üzrə);
- Bakı Hərbi Məhkəməsi;
- 1 saylı Bakı yerli İqtisad Məhkəməsi;
- 2 saylı Bakı yerli İqtisad Məhkəməsi.